Cada còp que consultatz un site Internet vòstre navigador envia una seria de paramètres apelats « entèstas ». Un d’aquestes paramètres es las lengas que volètz legir en visitant un site, triadas per òrdre de preferéncias.
Malaürosament lo monde pensan pas de personalizar lor navigador Internet. Sabiatz que podètz indicar una talha de tèxt per defaut, precisar que vos estimatz mai los tèmas de colors escurs, causir lo dorsièr de telecargament per defaut, definir cossí volètz gerir los cookies ?
Provar
L’aisina que metèm a disposicion vos fa veire vòstras preferéncias lingüisticas e vos explica cossí configurar vòstre navigador per demandar que los tèxtes sián en occitan.
Un còp los resultats a l’ecran, vos cal seguir las consignas per cambiar vòstres paramètres. Un cop fach, actualizatz la pagina. Normalament auretz totes los indicadors en verd.
Informacions tecnicas
La pròva es compausada de dos ensages. Un costat servidor e un costat client. Lo primièr permet de verificar las entèstas HTTP enviadas pel navigador e lo segond permet de s’avisar de las informacions configuradas localament. Se la connexion passa per un servidor mandatari o un tunèl de connexion poiriá arribar que las entèstas HTTP sián tiradas o modificadas per enfortir l’anonimat per exemple (emprunta numerica mens fòrta).
Desvolopament
Lo còdi es dubèrt, jos licéncias CC BY NC SA, per permetre a d’autras lengas de provesir lo meteis servici als seus locutors.