Abans tot, verificatz la legislation locala vòstra tocant lo tèma de l’emulacion de vidèo jòcs. Sovent devètz possedir una còpia materiala del jòc original per jogar legalament a sa version numerica, apelada ROM.
L’ofèrta de logicials d’emulacion de consòla es ben larga e una comunautat activa contribuís a provesir d’ajustaments e personalizacions per rendre mai agradiva l’experiénça. S’agís sovent de programas informaticas jos licéncia liura per permetre a cadun de melhorar lo còdi font. En informatica apondre una lenga de mai o dètz es la meteissa causa : un còp lo gestionari del multilingüisme codat apondre una lenga es tan simple coma apondre un fichièr de traduccion, o gaireben.
Autobleem es un emulator previst per foncionar sus la PlayStation classic, la primièra consòla de Sony mas en mai pichona e desprovesida de lector optic. Aqueste emulator permet de lançar una interfàcia grafica per aviar de ROM prealablament cargats sus un mèdia amovible. Disponible en 16 lengas, l’occitan n’es una dempuèi junh de 2019. Trapatz mai d’entresenhas aquí sul repertòri del projècte
Batocera-linux es un emulator que s’installa sus un ordenador o una carta del tipe Raspberry Pi. Es un sistèma operatiu Linux complèt amb tot çò que cal per montar una bòrna d’arcade pels utilizaires mai avançats. Vejatz lo site web de Batocera per conéisser totas las possibilitats e los prerequerits tecnics. L’occitan i es present dempuèi la version 5.27 del 15 de setembre de 2020.
Lo vidèo jòc es pas sonque una interfàcia grafica en occitan, d’unes jòcs son disponibles complètament traduches per d’afogats benevòls que participan a aumentar la visibilitat de la lenga e la socializar. Qualques títols : Vau Serena, Minecraft, SuperTuxKart.